Mar 8 | AON | STEP | Anah nyumnah, kupaishi sabaishi armam armago shantorum shanak shape Jisas napeum. Eshesh shape arigaha 3-poreih nyumneh aria worigun natuh. Aria Jisas nahwar ananim disaipel hanaki aria nakripam nakri, “Eik yakri gihaum eshudok arpesh. Um maresh? Eshesh shanaki shani apak mape 3-poreih nyumneh agundok aria eshesh worigun wokesh aria nyurub baesh.

Mark 8

Jisas Nekesh Worigun 4,000-poreish Armam Armago

(Matyu 15:32-39)

1 Anah nyumnah, kupaishi sabaishi armam armago shantorum shanak shape Jisas napeum. Eshesh shape arigaha 3-poreih nyumneh aria worigun natuh. Aria Jisas nahwar ananim disaipel hanaki aria nakripam nakri, “Eik yakri gihaum eshudok arpesh. Um maresh? Eshesh shanaki shani apak mape 3-poreih nyumneh agundok aria eshesh worigun wokesh aria nyurub baesh. 3 Aria eik mare ikesh anagun worigun shishoh ba iyoh, aria kadak shatanam shunak um esheshirub warub um, eshesh ta shunak yah aria marubigos sesh aria shutu shubuh. Um maresh? Enesh douk shanaki rougunum.”

4 Aria ananim disaipel harigan hakri, “Agundok mapeik wehigunum arpesh uwok um. Douk namudok aria apak ta munak muparug anagun worigun agunum aria douk ta mubirom eshudok ihishmorim sabaishi arpesh?” 5 Aria anan narigam nakri, “Aria ipak pasuhwi makwunit bret?”

Aria amam hakripan hakri, “Apak masuhwi 7-poreit atin.”

6 Aria Jisas nakrip eshudok sabaishi arpesh shabuh shape atap. Aria anan nohuri atudok 7-poreit bret nasuhwot aria nenek beten nenek tenkyu um Iruhin aria nawarut nako ananim disaipel um hisiyat hubiromesh. Aria amam hatrunat, aria hape habiromesh hanak. 7 Aria amam hasuhwi anas karowis shokusi arbus shopunek. Aria Jisas nasuwos nenek beten nenek tenkyu um Iruhin aria neshopok ananim um hunak husiyasumesh shopunek. 8 Aria eshesh shashoh dugaresh aria shakusuk iri, ananim disaipel hatrishesh aria heshurukwi 7-poreiruh sararuh shishukniruh. Aria armam armago shawok eshudok worigun iri douk sabaishi abom um 4,000-poreish. Aria eshesh dugaresh aria Jisas neshopokesh shanak um esheshirub warub. 10 Aria douk anan neshopokesh shanakuk atin, aria ahudok atuh anan nani ananim disaipel hato bot aria hanakum anarub warub douk bape shokugi nahobig Dalmanuta iri.

Amam Farisi Harig Jisas Um Nunek Enen Iruhin Atun Neneken Iri Mour

(Matyu 16:1-4)

11 Aria douk anam Farisi hanak Jisas napeum aria hani anan hape hanatutukem. Amam hakri hukwiraehan, douk namudok aria amam hariganum nunek enen Iruhin atun neneken iri mour um hudukemesh um anan douk adur Iruhin neshopokan nanaki iri. 12 Aria Jisas hwosaranaguk abom ^{▼▼8:12 Jisas nenek giha abom um agundok amam hakanaguk agabus Iruhin um aria anan nakri nurepam aria douk hwosaranaguk.} aria nakri, “Ipak doukipari pakri eik inek enen Iruhin atun neneken iri mour aria ipak putrin um maresh? Adur atin eik yakripep, eik ta mare inek enen enyudokmori mour ipak putrin uwe, uwok.”

13 Anan nakrip amam Farisi namudok aria wata nakutumuk ba hapeik aria nani ananim disaipel hakitak hato bot aria hanak gani wobrehahig um debeigi waiyag Galili.

Jisas Nakripam Wobuwobren Baraen Um Amam Farisi Hani Herot Amamis Yis Douk Senek Bret Takitak Debeiti Iri

(Matyu 16:5-12)

14 Amam hanak aria Jisas ananim disaipel urkwip pokomuguk um husuhw anat bret shopunek. Amam douk hasuhw atut bret meyoh tetemumam bot. 15 Aria Jisas nakripam nakri, “Ipak gamo pudukemesh um amam Farisi huni Herot amamis yis.”

16 Aria douk anan nakripam namudok aria amam kanak hape haneyagwreh hakri, “Anan nakripap enyudok baraen um yis um maresh, apak douk madae musuhwi anat bret uwe.”

17 Aria Jisas iganig nadukemesh um amam hape haneyagwreh namudok um. Aria anan nakripam nakri, “Eik yakri uwok um ipak piyagwreh um agundok ipak bret wokep um. Ipak douk padukem baugenyum eikin baraen aka, uwok? 18 Ipak douk nabes sapenyep, aria ipak madae putik eshudok uwe? Aria ipak douk arigos sapenyep, aria ipak madae gamo pumnek uwe? Ipak douk urkwip wokepuguk um agundok nubokuhi yawor 5-poreit bret yabirom sabaishi 5,000-poreish arpesh abom um? Eik yabiromesh shashoh dugaresh aria shakusuk iri ipak patrishesh peshurukwi makwuniruh suraruh shishukniruh aria poruhubuk hakus?”

Aria amam hakripan hakri, “Apak meshurukwi 12-poreiruh sararuh.”

20 Aria Jisas wata shopunek narigam nakri, “Aria abudok nyutob eik yawor 7-poreit bret yabirom sabaishi 4,000-poreish abom armam armago, eshesh shashoh dugaresh aria shakusuk iri ipak patrishesh peshurukwi makwuniruh sararuh shishukniruh poruhubuk hakus?”

Aria amam hakripan hakri, “Apak meshurukwi 7-poreiruh.”

21 Aria anan naham aria narigam nakri, “Aria ipak douk madae pudukem enyudok baraen uwe um maresh? Eik douk madae ikripep um asudok aduris yis douk senek bret takitak debeiti iri uwe, uwok.”

Jisas Nagabe Anan Nabes Seshukan Iri Gani Betsaida

22 Aria Jisas nani ananim hanak arigaha hanak hatogur wabur Betsaida. Aria agundok enesh arpesh sharauri anan nabes seshukanari shanakumori Jisas aria shariganum nuweman wis aria nugabeyan. 23 Aria douk eshesh shakripan namudok aria anan narum anudok nabes seshukanari hanakumaguk adukum wabur aria Jisas nakuseh arpigas sape anudok ananis nabes. Douk nakusehas jurug aria nowem wis nabes aria narigan nakri, “Nyak nyatik enesh eshudok aka, uwok?”

24 Aria anudok nabes seshukanari natrugun aria nakri, “Eik yatik arpesh sharahaen aria eik madae gamo itrish wosik uwe. Eik yatrish ruhur atin kabi douk yatik rowos um.”

25 Aria Jisas wata shopunek nowem wis ananis nabes aria douk anan natrugun duk abom. Ananis nabes yopus abom aria anan gamo natrugun aria natik ihishmorim eshudok eneshenesh wosik. 26 Aria Jisas neshopokan nanak um ananit urupat aria nakripan nakri, “Nyak kare um nyakit urupat. Nyak mare nyutanam nyunak um wabur uwok.”

Pita Nakri Jisas Anan Douk Krais Douk Iruhin Nagraehan Neshopokan Nanakumori Nunarao Arpesh Iri

(Matyu 16:13-20; Luk 9:18-21)

27 Aria Jisas nani ananim disaipel hakutukuk Galili aria hakitak hanakum anarub warub douk bape shokugi nahobig Sisaria Filipai iri. Douk amam hanak yah aria Jisas narigam nakri, “Ipak pemnek arpesh shakri eik amiapen?”

28 Aria amam hakripan hakri, “Enesh shakri nyak douk Jon douk nenek baptaisumesh iri, aria enesh shakri nyak Ilaija, aria enesh shakri nyak anan profet.”

29 Aria anan narigam nakri, “Douk eshesh shakri namudok aria ipak kanak pakri eik amiapen?”

Aria Pita nakripan nakri, “Nyak Krais douk Iruhin nagraehen neshopoken nyanamori nyunarao arpesh iri.”

30 Aria Jisas nakripam dodogowinyi baraen nakri, “Douk ipak padukemesh aria ipak mare punak pukrip enesh arpesh um eik douk Krais douk Iruhin nagraehe aria neshopoke yanaki iri um.”

Jisas Nakripesh Um Agundok Ta Ananish Horim Shon Nugok Aria Ta Wata Nukitak Nupe Um

(Matyu 16:21-28; Luk 9:22-27)

31 Aria Jisas apa nakrip ananim disaipel nakri, “Eik Anudok Arman douk yatogur adurinyi arpen iri ta imnek debeiri eriger. Aria eshesh Juda esheshim debeimi huni debeimi pris huni amam henek skulumesh um lo iri, ta huke agabus aria huneke enenyenen. Aria ta she igok shurume wonugwehw biyeh nyumneh, aria hukri um biyeh atih nyumneh um, eik ta wata ikitak ipe.”

32 Enyudok baraen anan douk madae nukripam wobuwobren uwe, uwok. Anan nawerehen abom nakripam. Douk namudok aria Pita naran hanak heyotuguk anagas aria nape nahan nakri, “Nyak mare nyukri enyudok baraen.”

33 Aria Jisas natanam natik ananim disaipel aria naho Pita nakri, “Satan, kareik. Nyak douk madae nyugipesh Iruhin ananim urkum uwe. Nyak nyagipesh arpeship urkwip meyoh!”

34 Aria Jisas nahwar eshudok sabaishi arpesh shani ananim disaipel shanak agundok anan napeum aria nakripesh nakri, “Arpen douk nyukri nyugipesh eik iri, sagomatin enyen ta nyukri uwok abom um enyen mare nyugipesh enyenyim urkum. Aria enyen mare nyunogugur um shen nyugok um aria nyusah enyenyin rowog kruse um, aria enyen wosik ta nyugipeshe. 35 Aria ta enen arpen enyenyim urkum murum nyukri enyen mare nyugok aria nyupe namudok atin iri, enyen ta nyugok. Aria enyudok arpen douk nyunek eikin mour aria nyusuhw Iruhin ananin yopinyi baraen dodog iri kupaishi ta shen nyugok. Aria enyen ta wata nyupe wosik ihih nyumneh. 36 Aria eshudok arpesh douk shunogrem sabaishi eneshenesh eshudok, aria eshesh shukri eshesh douk shape wosik aria ta mare shugok iri, eshesh ta shugok abom. 37 Ta mare enen arpen nyukwu enyenyish eshudok eneshenesh um nyutor agundok um nyupe wosik ihih nyumneh um, uwok. 38 Aria shopunek douk, sabaishi arpesh shape agundok atap iri shape shenek eneshenesh yoweishi inahos. Eshesh shakenyuk agabus Iruhin ananin baraen shakri enyen madae adurin uwe. Aria ahudok nyumnah Eik Anudok Arman douk yatogur adurinyi arpen iri itanamori iniri Iruhin ananish yopiyopishi enselahos inakmori, Iruhin ta nutaurume itogur dodogoiwe atuwe abom itrugun abom aria inaki. Aria abudok nyutob eik inaki obi nyutob, eshudok arpesh douk shenenek abraen um eik, aria shakenyuk agabus eikin baraen iri, eik shopunek ta inekumesh abraen aria ikeshuk agab namudok atin.”